राजश्व संकलनमा २० प्रतिशतले बृद्धि

काठमाडौं । यस वर्ष राजस्व संकलनमा बृद्धि भएको छ । चालू आर्थिक वर्ष ०७३÷७४ वैशाख मसान्तसम्मको राजस्व संकलन गत वर्ष सोही अवधिको तुलनामा २० प्रतिशतले वृद्धि भएको अर्थ मन्त्रालयले जनाएको हो ।

आर्थिक वर्ष ०७३÷७४ वैशाखसम्मको राजस्व संकलनको लक्ष्य १ खर्ब ७९ अर्ब २८ करोड ४७ लाख ८७ हजार रहेकोमा १ खर्ब ८८ अर्ब ८५ करोड ७६ लाख ८४ हजार संकलन भई लक्ष्यको तुलनामा १०५ प्रतिशतको प्रगति भएको हो ।
यो गतवर्षको तुलनामा २० प्रतिशतले बढी हो । शीर्षकगत रूपमा बहेर्दा आयकरतर्फ १ खर्ब १ अर्ब ८१ करोड ७० लाख ३६ हजार, मूल्य अभिवृद्धि करतर्फ ४८ अर्ब ३२ करोड २४ लाख ११ हजार र अन्तःशुल्कतर्फ ३७ अर्ब २८ करोड ५७ लाख १६ हजार संकलन भएको छ । सो रकम लक्ष्यको तुलनामा आयकरतर्फ आयकर, वहालकर, ब्याजकर गरी १०७ प्रतिशत, मूल्यअभिवृद्धि करतर्फ १०१ प्रतिशत र अन्तःशुल्कतर्फ १०८ प्रतिशत हो ।
त्यसैगरी शिक्षा सेवा शुल्क र स्वास्थ्य सेवा कर क्रमशः ६४ करोड २८ लाख ४० हजार र ७८ करोड ९६ लाख ८१ हजार संकलन भएको छ । शिक्षा सेवा शुल्कतर्फ लक्ष्यको तुलनामा ९९ प्रतिशत र स्वास्थ्यसेवा करतर्फ लक्ष्यको तुलनामा ८८ प्रतिशत संकलन भएको छ ।
गत वर्षको तुलनामा आयकर वृद्धिदर १५ प्रतिशत, मूल्य अभिवृद्धि कर वृद्धिदर २५ प्रतिशत, अन्तःशुल्कको वृद्धिदर ३२ प्रतिशत, स्वास्थ्य सेवा कर वृद्धिदर २४ प्रतिशत र शिक्षा सेवा शुल्क वृद्धिदर ३२ प्रतिशत छ ।