२३ बैशाख २०७४, शनिबार

झापा । स्वदेशमा आम्दानीको भरपर्दो स्रोत नभएको भन्दै विदेशी भूमिमा आफ्नो श्रम र सीप खर्चने युवाको कमी छैन । रोजगारका लागि दैनिकजसो विदेश जानेको सङ्ख्या बढ्दै गएको छ ।

विदेशमा श्रम गरेर आर्जन गरेको रकमले स्वदेशमै उद्यमी बन्ने युवा अहिले बढ्दै गएका छन् । विदेशबाट फर्किएपछि कसैले उद्योग, कसैले व्यापार त कसैले कृषिलाई आफ्नो जीविकोपार्जनको माध्यम बनाएका छन् । त्यसैबाट उनीहरु नाम र दाम कमाउन सफल भएका छन् ।

विदेशको आम्दानीलाई स्वदेशमा लगानी गरेर कमल गाउँपालिका–३ तोपगाछीका रितु भण्डारी बङ्गुरपालनको माध्यमबाट मनग्य आम्दानी गर्न सफल भएका छन् ।

विसं २०५३ मा १७ वर्षको उमेरमा रितु श्रम गर्न कतार गए । करिब २७ महिना कतारको बसाइ पछि उनीस्वदेश फर्किए । कतारमा सोचे अनुसारको आम्दानी नभएपछि उहाँ पुनः मलेसिया गए ।

मलेसियाबाट फर्केपछि उनले बङ्गुरपालन व्यवसाय रोज्नुभयो । भण्डारीले रू २५ लाखको लगानीमा लक्ष्मी बङ्गुर फार्म सञ्चालन गरे । सुरुमा उनले ४० वटा माउ बङ्गुर खरीद गरेर पाठापाठी उत्पादन सुरु गरे । बङ्गुरपालनबाट छोटो समयमा मनग्य आम्दानी लिन सकिन्छ भन्ने बुझेर नै व्यवसाय थालेको उनको भनाइ छ ।

एक पटकमा एउटा माउ बङ्गुरले १६÷१७ वटा पाठापाठी पाउने गरेको उनी बताउँछन् । भण्डारीले अहिले मासिक रू चार लाख बराबरको पाठापाठी बेच्ने गरेका छन् । “मासिक रु दुई लाख आम्दानी हुन्छ,” उनले भने ।

उनले उत्पादन गरेका पाठापाठी अहिले भारतको सिक्किम, दार्जिलिङ, खर्र्साङलगायत ठाउँका व्यापारीले खरिद गर्ने गरेका छन् । “पाठापाठी खरिद गर्न अहिले व्यापारी घरमै आउँछन्,” उनले भने ।

उनले फार्ममा हेमयार र ड्यूर उन्नत जातका बङ्गुरको पाठापाठी उत्पादन हुन्छ । पाठापाठी प्रतिओटा रू चार हजार सम्ममा बिक्री हुने गरेको भण्डारीले बताए । उनको फार्ममा दुई जनाले रोजगारी समेत पाएका छन् । सरकारले विदेशमा आफ्नो श्रम खर्चिरहेका युवालाई स्वदेशमै काम गर्ने वातावरण बनाउनुपर्ने उनले जोड दिए।

“सरकारले व्यवसाय सञ्चालन गर्न युवालाई सहुलियतमा ऋण दिनुपर्छ,” उनले भने । पहुँच हुनेले किसानको नाममा सुविधा उपभोग गरिरहेकाले सरकारले अगुमन गरी वास्तविक किसानलाई राहत दिनुपर्ने भण्डारीको भनाइ छ । भण्डारीले यस वर्ष जिल्ला पशु सेवा कार्यालयबाट ‘बङ्गुर व्यवसाय प्रबद्र्धन कार्यक्रम’अन्तर्गत रु एक लाख अनुदान पाएका छन् ।

LIVE TV