२२ बैशाख २०७४, शुक्रबार

 

बेँसीसहर (लमजुङ) । स्थानीय तहको प्रमुख पदका लागि लमजुङमा दुई महिलाको मात्र उम्मेदवारी परेको छ ।

चार गाउँपालिका र चार नगरपालिका रहेको जिल्लामा एउटै गाउँपालिकाको अध्यक्षका लागि दुई महिलाको उम्मेदवारी परेको हो । दूधपोखरी गाउँपालिका अध्यक्षका लागि नेपाली काँग्रेसको तर्फबाट छुपीमाया गुरुङले उम्मेदवारी दिनुभएको छ । गुरुङ नेपाली काँग्रेसको महासमिति सदस्य हुनुहुन्छ ।

यस्तै सोही गाउँपालिकामा नेकपा (माओवादी केन्द्र)को तर्फबाट सतीमाया तामाङको उम्मेदवारी परेको छ । तामाङ नेकपा (माओवादी केन्द्र)को केन्द्रीय सदस्य हुनुहुन्छ । उहाँ नेकपा (एमाले) र नेकपा (माओवादी केन्द्र) गठबन्धनको साझा उम्मेदवार हुनुहुन्छ ।

दूधपोखरी गाउँपालिकामा काँग्रेसबाट उपप्रमुखमा रामहरि न्यौपाने हुनुहुन्छ भने नेकपा (एमाले) र नेकपा (माओवादी केन्द्र) गठबन्धनबाट धनबहादुर गुरुङको उम्मेदवारी परेको छ ।

यसैबीच जिल्लामा विभिन्न पदमा उम्मेदवारी दिएका ५६ जनाले उम्मेदवारी फिर्ता लिएका छन् । मुख्य निर्वाचन अधिकृत अर्जुन अधिकारीका अनुसार बेँसीसहर नगरपालिकाबाट उपप्रमुखसहित ११ जनाले उम्मेदवारी फिर्ता लिएका छन् । रासस

LIVE TV