१६ चैत्र २०७३, बुधबार

त्रिशूली ,नुवाकोट । नेकपा एमाले विदुर नगरपालिका कमिटीले शिवपुरी गाउँपालिकामा नेकपामाओवादी केन्द्रले दुप्चेश्वर गाउँपालिकाको समुन्द्रटारमा र नेपाली काँग्रेसले शिवपुरीमै कार्यकर्ता भेटघाट गरिसकेको छ ।

अहिले नुवाकोटका विभिन्न राजनीतिक दल स्थानीय तहको निर्वाचनमा केन्द्रित भएर आआफ्नो पार्टीको सङ्गठन विस्तार र कार्यकर्ता भेलामा सक्रिय भइरहेका छन् ।

झन्डै दुईदशकपछि हुन लागेको स्थानीय तहको निर्वाचनले गाउँगाउँमा राजनीतिक सरगर्मी निकै बढाएको छ ।

जिल्लामा अहिले नेकपा एमाले, नेपाली काँग्रेस र नेकपा माओवादी केन्द्रले आफ्नो निर्वाचन केन्द्रित अभियानलाई तीव्रता दिइरहेका छन् ।

निर्वाचनलाई केन्द्रित गरेर नेकपा एमालेले गाउँपालिका अनुसारको पदाधिकारी चयन गरी कार्यक्षेत्रमा खटाइसकेको छ भने नेकपा माओवादी केन्द्रले पनि नयाँ संरचनाअनुसारको गाउँपालिका र नगरपालिकामा संयोजक र इन्चार्ज तोकिसकेको छ ।

नेकपा एमालेका जिल्ला सचिव बुद्धि प्रधानले निर्वाचन केन्द्रित अभियानअन्तर्गत कार्यक्रम सञ्चालन भइरहेको बताउनुभयो । “हामीले वडा र गाउँपालिकास्तरमा कार्यकर्ता भेटघाट, अन्तक्र्रिया कार्यक्रम सञ्चालन गरिरहेका छौँ”, उनले भने – “वडास्तरदेखि गाउँपालिका÷नगरपालिकास्तरका निर्वाचन केन्द्रित कार्यक्रमलाई तीव्रता दिएका छौँ ।”

नेपाली काँग्रेसले पुनःसंरचनाअनुसारको नयाँ कार्यसमिति चयन नगरे पनि कार्यकर्ता भेला र अन्तक्र्रिया भन्दै गतिविधिलाई तीव्रता दिएको जिल्ला सचिव सुरेन्द्रराज अधिकारीले बताए । उक्त दलले तारकेश्वर गाउँपालिका, किस्पाङ गाउँपालिका, मेघाङ गाउँपालिकाका कार्यकर्ता भेटघाट कार्यक्रम गरिसकेको छ ।

नेकपा माओवादी केन्द्रले पनि निर्वाचन केन्द्रित अभियानलाई गाउँगाउँमा सञ्चालन गरिरहेको छ । केन्द्रका जिल्ला अध्यक्ष हिरानाथ खतिवडाले नयाँ संरचनाअनुसारका सङ्गठन निर्माण र निर्वाचनलाई ध्यानमा राखी अभियान चलाइरहेको बताए ।

दुई नगरपालिका र १० गाउँपालिका रहेको नुवाकोटमा ८८ वटा वडा छ । राजनीतिक दलका कार्यकर्ताहरुमा वडा, गाउँ÷नगरपालिकाका कसलाई उम्मेदवार बनाउने भन्ने बहससमेत चल्न थालेको छ ।

लामो समयको चुनावी मौनता तोडिन लागेकाले अहिले पार्टीका कार्यकर्ता मात्र होइन, सर्वसाधारण मतदातामा समेत उत्साह थपिएको नेकपा एमालेसँग आबद्ध युवा राजकृष्ण राजभण्डारीले बताए । “दलका कार्यकर्तालाई चुनावी रौनक लाग्ने नै भयो । त्योभन्दा बढी सामान्य मतदातामा उत्साह रहेको पाइएको छ”, उनले भने – “लामो समय निर्वाचन नभएको कारण हुनसक्छ । सर्वसाधारण बढी उत्साही देखिएका ।”

निर्वाचनको उत्साह विशेष गरी युवामा देखिएको छ । अहिलेसम्म स्थानीय तहमा आफूले नेतृत्व छान्ने अवसर नपाएका युवाले यसपालिको निर्वाचनमा हुने सहभागितालाई महत्वपूर्ण रुपमा लिएको खानीगाउँका युवा क्षितिज थापामगरले बताए ।

विसं २०५६ मा १७ वर्ष उमेर भएका कारण स्थानीय निकायको निर्वाचनमा मतदान गर्न नपाएका युवा अहिले ३६ वर्षको भइसकेका छन् । दुईदशकदेखिको निर्वाचनको रित्ततालाई अहिलेको निर्वाचनले भर्न लागेका कारण पनि युवामा बढी उत्साह थपिएको सूर्यमतिका धनबहादुर मिजारले बताए ।

एक लाख ८९ हजार ५९० मतदाता रहेको नुवाकोटमा १२८ निर्वाचनस्थल र २५१ मतदान केन्द्र कायम भएको जिल्ला निर्वाचन कार्यालयले जनाएको छ ।

LIVE TV