६ चैत्र २०७३, आईतवार

काठमाडौं । नेपाल वन सेवाको श्रेणीविहीन स्थायी पदमा आवेदन दिनेको लोकसेवा आयोगको केन्द्रीय कार्यालयमा भीड लागेको छ । कक्षा ८ उत्तीर्णको शैक्षिक योग्यता तोकिएको भए पनि स्नातकोत्तर तह उत्तीर्ण गरेका पनि आवेदन दिन आयोग पुगेका छन् ।

काठमाडौं स्थित आयोगको केन्द्रीय मध्याञ्चल विकास क्षेत्रका लागि वनरक्षक ५३ र गेम स्काउट ९५ स्थायी पदका लागि स्नातकोत्तर तह उत्तीर्ण गरेका पनि आवेदन दिन पुगेका हुन् ।

आयोग परिसरका गणित विषयमा स्नातकोत्तर तह उत्तीर्ण गरेका गुल्मी बल्लेटक्सारका निर्मल भण्डारी वनरक्षक र गेम स्काउटका लागि फाराम भरेको बताए । उनले निजामती सेवामा प्रवेश गर्न आफूले आवेदन दिएको जानकारी दिए ।

“निजामतीमा प्रवेश गर्ने उमेर नाघ्न थालेकाले मैले वनरक्षक र गेम स्काउटमा जागिर खान आवेदन दिन आएको हुँ,” उनले भने “अहिले श्रेणीविहीनमा जागिर खाएपछि माथिल्लो तहमा उमेरले छेकवार गर्दैन ।”

काठमाडौँका नाम चलेका कलेजमा पढाए मनग्य आम्दानी हुने गरे पनि निजामती सेवाको आकर्षणले गर्दा अहिले श्रेणीविहीन पदमै भए पनि जागिर खान मन लागेको उनि बताउँछन् ।
विगत दुई वर्षदेखि आयोगको परीक्षा दिँदै आएका भण्डारी यसअघि शाखा अधिकृत र नायब सुब्बाको प्रथम चरणको परीक्षासमेत दिईुकेका छन् ।
“मैले शाखा अधिकृतको प्रथम चरणको परीक्षा पास गरेको छु । दोस्रो, तेस्रो र चौथो परीक्षा अझै बाँकी छ,” उनले भघने – “ती अन्य परीक्षा पास हुने सुनिश्चित छैन । त्यसैले अहिले कम्तीमा श्रेणीविहीनमार्फत निजामतीमा प्रवेश गर्ने रहर छ ।”

आयोगकै परिसरका अछाम घर भएका अङ्ग्रेजीमा स्नातकोत्तर तह उत्तीर्ण गरेका कल्याण बजगार्इं पनि वनरक्षक र गेम स्काउटका लागि आवेदन दिन पुगेका थिए । बजगाईं पनि निजामती सेवामा आफ्नो स्थान सुरक्षित गर्न श्रेणीविहीन पदमा आवेदन दिन आएको बताउँछन् ।

“कक्षा ८ उत्तीर्ण भए मात्र पुग्ने पदमा नाम निकालेर सजिलै निजामती सेवामा प्रवेश गर्ने ध्याउन्नाले आवदेन दिन आएको हुँ,” उनि बताउँछन् “मेरो सानैदेखि निजामती सेवामा प्रवेश गर्ने रहर थियो ।”
बजगाईंले यसअघि विद्यालय निरीक्षक, शाखा अधिकृत, नायब सुब्बा र खरिदारजस्ता पदमा आवेदन दिईुकेका छन् । आयोगले फाराम बुझाउने अन्तिम दिन मङ्गलबारलाई तोकेको छ ।

LIVE TV