१६ भाद्र २०७३, बिहीबार

रत्ननगर (चितवन), भदौ । विभिन्न जिल्लाबाट मानव तस्करले बेचबिखन गर्न लैजाँदै गर्दा चितवनबाट गएको एकबर्षमा १०३ जना महिलाको उद्धार भएको छ ।

माइती नेपालले गएको एक वर्षमा यसरी चितवनबाट १०३ जना चेलीको उद्धार गरी घर फर्काएको क्षेत्रीय कार्यक्रम अधिकृत युवराज दवाडीले जानकारी दिनुभयो । विभिन्न सचेतना कार्यक्रम तथा सडकमै सूचना केन्द्र स्थापना गरेर गाडीमा जाँच गर्ने अनि शङ्कास्पद लागेकालाई सोधखोज गर्दा उनीहरुलाई पत्ता लगाएर घर फर्काइएको हो । तर यसरी उनीहरुलाई घर फर्काइए पनि पीडक भने सजिलै उम्कने गरेको दवाडीले जानकारी दिनुभयो ।

यसरी उद्धार गरिएकामा १० देखि १६ वर्ष उमेरका ५२, १७ देखि २० वर्ष उमेरका २३ तथा २१ देखि ३५ वर्षका २८ जना रहेका छन् ।

यस्तै, माइती नेपालले २९ वटा घरेलु हिंसाका घटनामा आफूहरुले काम गरेको जनाएको छ । उद्धार गरिएका चेलीले समेत स्पष्ट कुरा नभनिदिने, भनिहालेमा पनि कानुन कार्यान्वयन गर्ने निकाय फितलो हुने, अभिभावक संवेदनशील नहुनेलगायत समस्याका कारण उनीहरु सजिलै उम्कने गरेको दुखेसो माइती नेपाल चितवनको छ । १०३ जना उद्धार गर्दा जम्मा चारजना मात्रै कारबाहीको दायरामा पुग्नुले पनि यसलाई पुष्टि गरेको छ ।

पछिल्लो समयमा अधिकांश चेली भूकम्पप्रभावित जिल्लाबाट आउने गरेको र भूकम्पले बुबाआमा गुमाएका, घर भत्किएका र पीडित बनेका धेरै रहेको माइती नेपालकी मनोविमर्शकर्ता जयन्ती खनालले जानकारी दिनुभयो ।

उहाँका अनुसार गोरखा, धादिङ, लमजुङ, नुवाकोटलगायत जिल्लाका चेलीलाई चितवन हुँदै भारत लैजाने गरेको पाइएको छ । “विभिन्न जिल्लाबाट चितवनमा ल्याएर राख्ने, अनि अनुकूल भएपछि भारत लैजाने गरेको पाइयो”, खनालले भन्नुभयो, “चितवनलाई तस्करले ट्रान्जिट प्वाइन्ट बनाएका रहेछन्, यसतर्फ सबै निकायको ध्यान जानुपर्छ ।”

सूचनाकर्ता एलिसा श्रेष्ठ चेलीको गतिविधि मूल्याङ्कन गर्ने, गाडीमा अनुगमन गर्ने गरेकाले सोही क्षेत्रबाट बढी चेलीको उद्धार गरेको जानकारी दिनुभयो । उनीहरुले राम्ररी कुरा नगर्दा हाउभाउको आधारमै चेलीको गतिविधि थाहा हुने गरेको उहाँले बताउनुभयो । रासस

LIVE TV