१३ श्रावण २०७३, बिहीबार

केही दिनयता लगातार भइरहेको वर्षाले मुलुकको आन्तरिक उडानमा समस्या देखिएको छ । मौसम बदलीसँगै मुलुकभर जारी वर्षातले अन्तराष्ट्रिय उडानमा भने कुनै समस्या आएको छैन । तर हिमाली तथा पहाडी क्षेत्रको उडान भने प्रभावित भएको छ ।


मौसम खरावीले खासगरी पूर्वी पहाडी र पश्चिमका केही विमानस्थलमा उडान प्रभावित भएको त्रिभुवन अन्तराष्ट्रिय विमानस्थलले जनाएको छ । मुलुकको एक मात्र अन्तराष्ट्रिय विमानस्थलबाट हुने सबै अन्तराष्ट्रिय उडान नियमित रुपमा सञ्चालन भइरहेका छन् । विमानस्थलका अनुसार वर्षाले आन्तरिकतर्फ नियमित उडान केही प्रभावित भएको छ । पहाडी भेगका सोलुखुम्बु, भोजपुर, ताप्लेजुङलगायतका गन्तव्यमा उडानमा समस्या आएको हो ।
यता, मौसम पूर्वानुमान महाशाखाले पनि पूर्वी पहाडी भेगबाहेक अन्य स्थानमा भिजिबिलिटी राम्रो रहेको र उडानमा समस्या नरहेको जनाएको छ । मौसमविद् सुवास रिमालले पूर्वका ताप्लेजुङ, ओखलढुङ्गा आदि स्थानमा बदली भई बाक्लो कुहिरो लागेकाले समस्या हुनसक्ने र अन्य स्थानमा भने सामान्य रहेको बताए । विमानस्थलका अनुसार आन्तरिकतर्फ आठ र अन्तराष्ट्रिय तर्फ २६ वटा एयरलाइन्सले त्रिभुवन विमानस्थलबाट उडान भर्दै आएका छन् ।

LIVE TV