४ श्रावण २०७३, मंगलवार

सभामुख ओनसरी घर्तीले आफूले पाउनुपर्ने हकअधिकारका बारेमा जानकारी नहुँदा महिलाले पाउनुपर्ने सुविधाबाट वञ्चित हुनुपरेको बताउनुभएको छ ।

राष्ट्रिय सूचना आयोगले यहाँ आज आयोजना गरेको ‘लैङ्गिक समानता तथा महिला सशक्तीकरणका लागि सूचनाको हक’ विषयक कार्यक्रममा उहाँले सरकारले महिलाका लागि गरेको व्यवस्थाका बारेमा थाहा नहुँदा सुविधाबाट वञ्चित हुनुपरेको बताउनुभयो ।

“महिलाका बारेमा सरकारले जे–जे व्यवस्था गरेको छ, तर त्यसका बारेमा धेरै महिलालाई जानकारी छैन, सबै महिलाले आफूले पाउने सुविधाको खोजी गर्नुस्”– सभामुख घर्तीले भन्नुभयो । राष्ट्रिय एकता, सामाजिक सद्भाव भड्काउने लगायतका राज्यको सुरक्षा खतरामा पु¥याउनेबाहेकका सूचना खोजीखोजी लिनका लागि सम्पूर्ण महिलालाई उहाँले आग्रहसमेत गर्नुभयो ।

सभामुख घर्तीले नेपालको संविधानले महिलाका विषयमा केहीमात्रामा भए पनि व्यवस्था गरिएको र सो कार्यान्वयनको तहमा सबैले सहयोग गर्नुपर्नेमा जोड दिनुभयो ।

“चेतना सबैभन्दा ठूलो शक्ति हो, संविधानमा राखिएका प्रावधान कार्यान्वयन भएन भने सेतो कागजमा लेखिएको काला अक्षरबाहेक केही हुने छैन, यसको कार्यान्वयनमा सबै एकजुट हुुनुपर्छ”– उहाँले आग्रह गर्नुभयो । आयोगका प्रमुख आयुक्त कृष्णहरि बास्कोटाले नेपालमा भएका ४०० कानुनमध्ये २५० भन्दा बढी कानुनमा गोप्य राख्ने कुराप्रति आयोगको आपत्ति रहेको भन्दै सो सच्याउनका लागि ध्यानाकर्षण गराइरहेको जानकारी दिनुभयो ।

सूचना आयुक्त किरण पोखरेलले महिला सुसूचित भएमात्र घर, परिवार, समाज र राष्ट्र नै सुसूचित हुनेहुँदा सूचनाको हकबारे महिलालाई जानकारी गराउन आवश्यक भएको बताउनुभयो । अर्का आयुक्त यशोदा तिमिल्सिनाले सूचना २१औँ शताब्दीमा शक्ति भनिए पनि महिलाको सूचनामा पहुँच अझै पुग्न नसकेको र देशमा २००७ सालदेखि अहिलेसम्मको बेथिति नागरिकले थाहा नपाएको भएको जिकिर गर्नुभयो ।

कार्यक्रममा आयोगद्वारा प्रकाशित ‘महिलाका सुविधासम्बन्धी सूचना’ पुस्तिका सार्वजनिक गरियो । जसमा महिलाले पाउनुपर्ने हकका बारेमा उल्लेख गरिएको छ । रासस

LIVE TV