२९ जेष्ठ २०७३, शनिबार

शक्ति प्रदर्शनका लागि पहिलोपटक जनमैत्री जुलुश निकालिदैं, सडकपेटीबाट जुलुसका सहभागी हिड्ने

पूर्व प्रधानमन्त्री बाबुराम भट्टराई नेतृत्वको नयाँशक्ति नेपालले भोलि एक समारोहबीच दशरथ रङ्गशालामा औपचारिक रूपमा पार्टी घोषणा गर्नेभएको छ । आइतबार खुल्लासत्र सञ्चालन हुनेछ भने सोमबार र मङ्गलबार कमलादीस्थित नेपाल प्रज्ञा प्रतिष्ठानमा बन्दसत्र चल्ने बताइएको छ ।

नयाँ शक्ति नेपालको बन्दसत्रले पार्टीका थप पदाधिकारीको समेत टुङ्गो लगाउने छ । पार्टी घोषणका लागि नेता देवेन्द्र पौडेलको नेतृत्वमा मूल व्यवस्थापन समिति र १४ वटा उपसमिति गठन गरिएको छ । घोषणा समारोहमा ७५ जिल्लाबाटै प्रतिनिधिले सहभागिता जनाउने र विदेशबाट समेत प्रतिनिधि आउने संयोजक बाबुराम भट्टराईले जानकारी दिनुभयो ।

प्रधानमन्त्री केपी ओलीसहित नेपालका क्रियाशील सबै दल, नेपालस्थित २५ देशका राजदूतलाई समेत निम्तो गरिएको नयाँ शक्ति पार्टीले जनाएको छ । घोषणा सभामा शुभकामना दिन भारतीय नेता केसी त्यागी, डिपी त्रिपाठी, वामपन्थी पत्रकार आनन्दस्वरुप वर्मालगायत काठमाडौँ आइपुगेको देवकोटाले जानकारी दिनुभयो ।

कुपोन्डोल, बबरमहल, कालिमाटी र रत्नपार्कबाट सुरु हुने जुलुस अपराह्न १२ बजेभित्र रङ्गाशालामा प्रवेश गरिसक्नेछन् । जुलुसका कारण ट्राफिक व्यवस्थापनमा कठिनाइ नहोस भनी पैदलमार्गको बाटोबाट जुलुस सञ्चालन गरिने प्रवक्ता देवकोटाले बताउनुभयो ।

यसैबीच,  एमएस थापाको नेतृत्वमा रहेको संघीय जनमुक्ति पार्टी नयाँ शक्तिमा विलय भएको छ । जनमुक्ति पार्टीबाट विभाजित भई गठन भएको संघीय जनमुक्ति पार्टीले डाक्टर बाबुराम भट्टराई नेतृत्वको नयाँ शक्ति नेपालमा विलय भएको हो । ललितपुरमा भएको कार्यक्रममा संघीय जनमुक्तिका पार्टीका अध्यक्ष एमएस थापामगरले पार्टीको पाँचौं महाधिवशेनले नयाँ शक्तिमा विलय हुने निर्णय गरेको जानकारी दिनुभयो ।

 

LIVE TV