भेडेटारबाट सन्दकपुरसम्म साइकलको लोभलाग्दो रुटको पहिचान

सुनसरी आसपासका क्षेत्रमा साईक्लिङ टुरिजमको विकासका लागि सक्रिय भएर लागेका युवाहरुले थप नयाँ गन्तव्य पत्ता लगाउँदै यस क्षेत्र तर्फ आन्तरिक पर्यटकलाई आकर्षित गर्न थालेका छन् ।

सुनसरीका विभिन्न स्थानका युवाहरु साइकल पर्यटनको प्रचार र विकासमा जोडतोडका साथ लागेका हुन् ।

साइकलमा मेची माहाकाली यात्रा गरिसकेका इटहरीका कमल श्रेष्ठले पूर्वी नेपाल साईक्लिङका लागि उपयुक्त स्थान भएको बताए । उनले स्वास्थ्यको लागि साईक्लिङ लाभदायक समेत भएको हुनाले सबैले यसलाई अपनाउनु पर्ने बताए ।

त्यस्तै अर्का साइक्लिस्ट युवराज कार्कीले मानिसको भागदौडपुर्ण जीवनमा स्वास्थ्य प्रति ध्यान नगएको हुँदा यसको प्रयोग आवश्यक रहेको औँल्याए । उनले साइकलको माध्यमबाट स्वास्थ्यको सुधार सँगै पर्यटन विकासमा समेत टेवा पु¥याउने हुँदा आफ्नो टिमले थप नयाँ स्थान पहिचान गर्न लागेको बताए ।

सुनसरीको कोशी टप्पु बन्य जन्तु आरक्षण आशपास, चारकोशे झाडी, तालतलैया, हसिना सिमसार क्षेत्र, भवानीपुर जँगल, गोकुल रिसोर्ट, मोरङको चारकोशे झाडी र वेतना सिमसार क्षेत्र, भेडेटार राजारानी  लगायतका पर्यटकीय स्थललाई साइक्लिङ टुरिजमको उपयुक्त गन्तव्य स्थलको रुपमा लिइएको छ ।

धरानका कृष्ण केसीले नेपालका विभिन्न क्षेत्रका पर्यटकलाई पुर्व भित्र्याइ साइक्लिङ टुरिजमको विषयमा सम्भावना प्रस्तुत गर्न सके धेरै फाइदा लिन सकिने बताए । उनले धरानकै बुढासुब्बा, दन्तकाली, पिडेश्वर, विष्णुपादुकाको धार्मिक क्षेत्र, गोरखा स्मृति पार्क, सुनसरीको बराहक्षेत्र लगायत साइकल पर्यटक लोभिने स्थान रहेको बताए ।

उनिहरुले सुदुरपुर्वको लागि साईकल रुट समेत पहिचान गरिसकेका छन् । धनकुटाको भेडेटारबाट राजारानी, वुधवारे, राँके बजारबाट इलाम बजार हुँदै माइपोखरी र सन्दकपुर सम्मको यात्राको प्याकेजका लागि ५ दिन लाग्ने रुट तय भइसकेको छ ।

यो रुट हुँदै यात्रा गरे पुर्वका अधिकाश सुन्दर स्थलको अवलोकन गर्न सकिन्छ भने पूर्वी नेपाल र भारतका अधिकाँश हिमालय पर्वतको अवलोकन गर्न सकिने छ ।