श्रंखलाबद्ध डुंगा डुब्दा सात सय जनाको मृत्यु,तीन दिनमा छ सय भन्दा बढिको उद्धार

संयुक्त राष्ट्रसंघीय शरणार्थी नियोग युएनएचसिआरले लिबियाको तटमा श्रृँखलाबद्ध रुपमा डुंगा डुब्दा सात सय भन्दा धेरै आप्रवासीको ज्यान गएको हुन सक्ने जनाएको छ ।

गएको बुधबार, बिहीबार र शुक्रबार अवैधानिक रुपमा युरोप प्रवेश गर्न चाहने आप्रवासी चढेको डुंगा डुब्दा धेरै मानिसको ज्यान गएको युएनएचसिआरले जनाएको हो ।

इटालीको दक्षिणी क्षेत्रमा पर्ने लिबियाको तटमा अफ्रिका हुँदै आएका आप्रवासी चढेका डुंगा डुबेका हुन् । ग्रिसले आप्रवासी आउने मार्ग रोकेपछि अहिले इटाली हुँदै लिबियाको मार्ग आप्रवासीले प्रयोग गर्ने गरेका छन् ।

बुधबार डुंगा डुब्दा हराएका झण्डै एक सय जना अझै बेपत्ता रहेको युएनएचसिआरकी प्रवक्ता कारलोट सामीले बताइन् । यस्तै बिहीबार बिहान लिबियाको साब्राथा तटमा डुबेका पाँच सय ५० जना भन्दा धेरै अझै हराइरहेको उनले बताइन् ।

शुक्रबार भएको अर्को डुंगा दुर्घटनामा परेका एक सय ३५ जनाको उद्दार गरिएको तथा ४५ जनाको शव भेटिएको युएनएचसिचारले जनाएको छ । तर एमएसएफ सि ग्रुपले भने गएको साता मात्रै नौ सय भन्दा धेरैको ज्यान गएको जनाएको छ ।

उद्दार गरिका आप्रवासीलाई इटालीको टोरन्टो र पोजालियोमा लगिएको छ । शनिबार मात्रै ६ सय भन्दा धेरै आप्रवासीको लिबियाको तटबाट उद्दार गरिएको इटालीका अधिकारीले बताएका छन् ।