१५ बैशाख २०७३, बुधबार

चितवन, कविलास गाविस–९ कुसुमटारमा विवाह भोज खाँदा ३२ जना बिरामी परेका छन् ।

bhoj
स्थानीयका अनुसार गत सोमबार दिउँसो गाउँमै विवाह भोज खाएपछि गाउँले बिरामी पर्न थालेका हुन् । क्रमिक रुपमा बिरामी हुने क्रम बढेपछि हिजो दिउँसोबाट उनीहरु भरतपुर अस्पताल आउन थालेका थिए ।

आज दिउँसोसम्ममा ३२ जना अस्पताल भर्ना भएको जिल्ला प्रहरी कार्यालयले जनाएको छ । जसमध्ये तीन जना पुरुष रहेका छन् । उनीहरुमा झाडापखला लाग्ने, ज्वरो आउने, वान्ता हुनेलगायतको समस्या देखिएको चिकित्सकले बताएका छन् ।

भोज खाएर गएदेखि नै वान्ता हुने र झाडापखला लाग्न सुरु भएको बिरामी शारदा ताामाङले बताउनुभयो । “सुरुमा त अरु केही कारणले मलाई मात्रै भएको होला भनेको थिएँ, पछि अरु गाउँलेले समेत यस्तै समस्या भएको थाहा पाएपछि भोजकै कैफियत हो भन्ने लाग्यो” उहाँले भन्नुभयो ।

भरतपुर अस्पतालका मेडिकल विभाग प्रमुख डा विजय पौडेलले विषाक्त खानाका कारण उनीहरु बिरामी परेको बताउनुभयो । भोजको खाना खाँदा ब्याक्टेरियल टक्सिन पेटमा पुगेर रगत प्रभावित भएपछि यस्तो समस्या देखिएको उहाँको भनाइ छ । उहाँले सबै बिरामीको अवस्था खतरामुक्त हुँदै गएको बताउनभुयो । रासस

 

LIVE TV