प्रधानमन्त्रीद्धारा पुननिर्माण अभियानको शिलान्यास:पुनर्निर्माण नसकिएसम्म सरकार नथाक्ने

प्रधानमन्त्री ओलीद्धारा सिन्धुपाल्चोकमा स्थानीयवासीको घरको शिलान्यास, पुनर्निर्माण नसकिएसम्म सरकार नथाक्ने, भूकम्प नै वर्तमान सरकारले बोकेर ल्याइदिएको झै व्यवहार गरेको गुनासो

भूकम्पको ठीक एक वर्षपछि सिन्धुपाल्चोक जिल्लामा पुननिर्माणको अभियान सुरु भएको छ । सिन्धुपाल्चोकको तिनै क्षेत्रमा एकै पटक स्थानीयवासीको घर पुनर्निर्माण गर्दै अभियानको आरम्भ गरिएको हो ।

मानवीय र भौतिक हिसाबले सबैभन्दा बढी क्षति भएको सिन्धुपाल्चोकमा एक वर्षपछि मात्रै पुन निर्माण सुरु भएपछि स्थानीयले अब घर निर्माण हुने आशा गरेका छन् । सिन्धुपाल्चोकमा आइतबार भुकम्प गएको समय ११ बजेर ५६ मिनेटमा प्रधानमन्त्री केपी शर्मा ओलीले चौतारा नगरपालिका ३ स्याङबो टोलबाट पुन निर्माणको सुरुवात गर्नु भएको थियो । प्रधानमन्त्री ओलीले स्याङबो टोलका स्थानीय सर्बे तामाङको घर शिलान्यास गरेर पुनर्निर्माणको सुरुवात गर्नुृ भएको थियो । त्यस्तै क्षेत्र नम्बर १ को कर्थली गाविसमा सासंद मोहनबहादुर बस्नेत र क्षेत्र नम्बर ३ मा सासंद शेरबहादुर तामाङले सोही समयमा पुननिर्माणको सुरुवात गर्नु भएको थियो ।

चौतारामा आयोजित विशेष कार्यक्रममा प्रधानमन्त्री ओलीले एकल महिला यदुमाया घोरासैनीलाई घर निर्माणको सम्झौता पत्र हस्तान्तरण गर्नुभएको थियो । क्षेत्र नम्बर २ का सभासद एवम वन मन्त्री अग्नि सापकोटा र सासंद अमृतकुमार बोहरा पनि कार्यक्रममा सहभागी हुनुहुन्थ्यो । कार्यक्रममा प्रधानमन्त्री ओलीले ढिलै भएपनि पुनर्निर्माण सुरु भएकाले अब जनताको घर नबन्दा सम्म अभियान नरोकिने प्रष्ट पार्नुभयो । उहाँले अब शिलन्यास मात्रै नभई घर पनि पुन निर्माण हुने बताउँदै केही मान्छेहरुले भुकम्प नै यही सरकारले बोकेर ल्यादिएको जस्तो व्यवहार गरेको गुनासो गर्नुभयो । नाकाबन्दी,पुननिर्माण प्राधिकरण गठनमा ढिलाई लगायतका कारणले पुन निर्माण ढिलाई भएको प्रधानमन्त्री ओलीको प्रष्टोक्ति थियो ।

पुननिर्माण सम्बन्धी विद्येयका पारित गर्न नै बढी समय लागेको र केही दलहरुले त्यसलाई अवरोध गरेकाले पनि पुनर्निर्माणमा ढिलाई भएको प्रधानमन्त्री ओलीको जिकिर थियो । भुकम्पपछि दात्तृ निकायहरुको सम्मेलन गरेर पुन निर्माणका लागि बजेट संकलन भएपनि दाता सम्मेलनमा कबुल गरेको रकम अझै नआएकोमा उहाँले चिन्ता व्यक्त गर्नुभयो । ४ खर्बको प्रतिबद्धता भएपनि अहिले जम्मा १ खर्ब ३० अर्ब मात्रै संकलन भएको ओलीले जानकारी दिनुभयो ।