चुनौतीका बाबजुद सरकारले ऐतिहासिक काम गरेको छ– मन्त्री पोखरेल

काठमाडौँ, संस्कृति, पर्यटन तथा नागरिक उड्डयनमन्त्री आनन्दप्रसाद पोखरेलले भूकम्प, भारतीय अघोषित नाकाबन्दी, तराई–मधेसको आन्दोलनका बाबजुद पनि सरकारले ऐतिहासिक उपलब्धि हासिल गरिरहेको बताउनुभएको छ ।

नेकपा (एमाले) दोलखा–काठमाडौँ सम्पर्क मञ्चद्वारा आज यहाँ आयोजित नयाँ वर्षको शुभकामना आदानप्रदान तथा अन्तक्र्रियामा उहाँले जटिल चुनौतीका समयमा आएको सरकारले ऐतिहासिक उपलब्धि हासिल गर्दै अघि बढेको बताउनुभयो ।

भ्रष्टाचारी र कालोबजारीलाई नियन्त्रण गर्न सरकारले प्रयास गरिरहेको भन्दै उहाँले आवश्यकताभन्दा बढी ग्यास थुपारेर राख्दा खतरा हुने भएकाले आवश्यकताभन्दा बढी ग्यास जम्मा नगर्न आग्रह गर्नुभयो ।

उहाँले दोलखाको लाकुरी डाँडास्थित खरीढुङ्गामा बन्न लागेको ‘चलचित्र नगरी’ को प्रक्रिया अघि बढिसकेको र यसले राष्ट्रिय तथा अन्तर्राष्ट्रिय कलाकार भित्रिनुका साथै उल्लेख्य रुपमा पर्यटक आउँदा स्थानीयको आर्थिक विकास हुने बताउनुभयो ।

हिन्दू सर्किट र बुद्ध सर्किट निर्माण गरी आगामी पाँच वर्षभित्रमा २६ लाख पर्यटक भित्र्याउने गरी पूर्वाधार तयार सरकारले गरिरहेको उहाँले जानकारी दिनुभयो ।

नेकपा (एमाले) का केन्द्रीय सदस्य तथा सांसद पार्वत गुरुङले दोलखाको समृद्धिका लागि चलचित्र नगरी निर्माणका साथै त्यहाँका धार्मिक तथा पर्यटकीय स्थानको प्रवद्र्धन गर्न आवश्यक रहेको बताउनुभयो ।

कलाकार मदनदास श्रेष्ठले दोलखा पर्यटकीय दृष्टिकोणले उपयुक्त गन्तव्य भए पनि त्यसको पहिचान गरेर विकास गर्न नसकेको हुनाले र पर्याप्त रुपमा त्यसको जानकारीको अभावका ओझेलमा परेको विचार व्यक्त गर्नुभयो । रासस