३० चैत्र २०७२, मंगलवार

मेडिकल काउन्सिलको चिकित्सक दर्ता प्रमाणपत्र (लाइसेन्स) परीक्षामा नेपालबाटै एमबीबीएस गरेका डाक्टरमध्ये एक चौथाइ फेल भएका छन्। कान्तिपुर दैनिकमा समाचार छ।

काउन्सिलका अनुसार मुलुकका १५ मेडिकल कलेजबाट एमबीबीएस गरेका १ हजार ३७ डाक्टरले लाइसेन्स परीक्षा दिएकामा ७ सय ८४ मात्र पास भएका छन् भने २ सय ५३ फेल भए। मुलुकबाटै एमबीबीएस गरेका कुल विद्यार्थीमध्ये २४ दशमलव ४ प्रतिशत फेल भएका हुन्।

doctor

‘स्वदेश वा विदेश जुनसुकै ठाउँमा डाक्टरी पढ्ने नेपाली विद्यार्थीको आधार पैसा नभएर मेरिट लिस्ट हुनुपर्ने पुष्टि यो नतिजाले गरेको छ,’ काउन्सिलका प्रवक्ता डा.कृष्ण अधिकारीले भने, ‘मेडिकल पढ्न मेरिट लिस्टलाई नै अझ बलियो आधार बनाउनुपर्नेतर्फ सबैले सोच्नुपर्छ।’

केही वर्षयता एमबीबीएस अध्ययनका लागि सहज गन्तव्य बनेको बंगलादेशको स्थिति भने झन् बेहाल छ। बंगलादेशका २७ मेडिकल कलेजबाट एमबीबीएस गरेका १ सय ९३ डाक्टर लाइसेन्स परीक्षामा सहभागी भएकामा ९३ जना फेल र १ सय जना पास भए। ५१ दशमलव ८ प्रतिशत सहभागी मात्र लाइसेन्स हासिल गर्न सफल भए।

चीनका २२ मेडिकल कलेजबाट एमबीबीएस गरेका १ सय ३३ डाक्टरले लाइसेन्स परीक्षा दिएकामा ४३ जना पास हुन सके भने ९० जना फेल भए। चीनबाट एमबीबीएस पास गरेर परीक्षा दिनेमध्ये करिब ६८ प्रतिशत फेल भएका हुन्।

भारतका ३ मेडिकल कलेजबाट पढेर आएका ४ विद्यार्थीमध्ये एक जना र पाकिस्तानका ३ मेडिकल कलेजबाट पढेका ७ मध्ये ५ जना फेल भएका छन्।

 

LIVE TV