वाग्मती सफाइका लागि सौर्य बत्ती

काठमाडौँ, गुह्येश्वरीबाट गोकर्णसम्मको पाँच किमी वाग्मती नदी किनारको दायाँबायाँका सडकमा फोहर फाल्न रोक्नका लागि सौर्य बत्ती जडान गरिनुपर्नेमा जोड दिइएको छ ।

वाग्मती किनार सौर्य उज्यालो कार्यक्रम उपभोक्ता समितिले आज जोरपाटीमा आयोजना गरेको कार्यक्रममा जनसङ्ख्या तथा वातावरण मन्त्री विश्वेन्द्र पासवानले वाग्मती नदीमा राति फोहर फालिने भएकाले सौर्य बत्ती जडान गरिनुपर्ने आवश्यकता औँल्याउनुभयो ।

“मन्त्रालयका तर्फबाट ३०० मेगावाट सौर्य ऊर्जा निकाल्ने तयारी भएको छ, विद्युत्भार कटौती घटाउन पनि सडक सौर्य बत्तीको विस्तार गरिनुपर्छ, सडकबाट तारको सडक बत्ती विस्थापित गरिनुपर्छ” – उहाँले भन्नुभयो ।

सांसद् रामेश्वर फुयाँलले वाग्मती नदीलाई स्वच्छ राख्न सडक सौर्य बत्तीको आवश्यकता भएकामा जोड दिनुभयो । “फोहर राति अँध्यारोमा फालिन्छ नदीको दायाँबायाँ दुवैतिर सौर्य बत्ती राखिएमा फोहर फाल्ने क्रम कम गर्न सकिन्छ, सडकमा राति आवतजावतका लागि पनि यसको आवश्यकता छ” – उहाँले भन्नुभयो ।

समितिका अध्यक्ष गोविन्द ढुङ्गेलले नदी किनारमा राखिएका बत्तीको सुरक्षा गर्न स्थानीयवासी तयार रहेको प्रतिबद्धता जनाउनुभयो । यो वर्ष सांसद् फुयाँलले निर्वाचन क्षेत्र विशेष पूर्वाधार विकास कार्यक्रमबाट रु सात लाख सौर्य बत्तीका लागि विनियोजन गर्नुभएको उहाँका स्वकीय सचिव मोहन गौतमले राससलाई जानकारी दिनुभयो ।

अनुमानित रु दुई करोड लाग्ने यो कार्यक्रमका लागि सङ्घीय मामिला तथा स्थानीय विकास मन्त्रालयबाट ७० प्रतिशत, यस क्षेत्रमा पर्ने काठमाडौँ महानगरपालिका, गोकर्णेश्वर नगरपालिका र कागेश्वरी मनोहरा नगरपालिकाबाट गरी १५ प्रतिशत बजेट माग गरिएको सो अवसरमा जानकारी दिइएको थियो ।

नदीको एकपट्टि किनारमा १०० वटा पोल लाग्ने, ब्याट्री र सौर्य प्यानलसहितको एउटा पोलको रु एक लाख पर्छ । रासस