ऐतिहासिक नारायणस्थान मन्दिर विकासको लागि गुरूयोजना निर्माण

दुई करोड २७ लाख बराबरको भौतिक संरचनाअन्तर्गत गेस्टहाउस, छठ पोखरी, क्यान्टिन, जडीबुटी नर्सरी, पर्खाल निर्माण, सौर्यबत्ती जडान, मुख्यद्वार निर्माण गर्ने योजना

इलाम, इलामको ऐतिहासिक नारायणस्थान मन्दिर क्षेत्र विकास गर्ने उद्देश्यले गुरूयोजना निर्माण प्रक्रिया अघि सारिएको छ ।

मन्दिर क्षेत्रको व्यापक विकास र विस्तार गर्ने उद्देश्यले नारायणस्थान धार्मिक क्षेत्र विकास समितिले गुरूयोजना निर्माण गरेको हो ।

समितिले रू दुई करोड २७ लाख बराबरको भौतिक संरचनाअन्तर्गत गेस्टहाउस, छठ पोखरी, क्यान्टिन, जडीबुटी नर्सरी, पर्खाल निर्माण, सौर्यबत्ती जडान, मुख्यद्वार निर्माण गर्ने योजना अघि सारिएको समितिका सचिव दिवाकर भण्डारीले बताउनुभयो ।

संरचना निर्माणका लागि बजेटसहितको खाका प्रस्तुत गरिने र सरोकारवाला निकायसँग बजेटका लागि पहल थालिएको छ ।

नारायणस्थान मन्दिरलाई धार्मिक, पर्यटकीय गन्तव्यको रूपमा, पर्यावरण संरक्षणको नमुना, स्थानीय पानी स्रोतको संरक्षण र सम्बद्र्वन, सामाजिक सद्भाव कायम गर्ने मुख्य उद्देश्यले गुरूयोजना तयार पारिएको उहाँले बताउनुभयो ।

मेची पहाडी क्षेत्र पर्यटन प्रवद्र्धन विकास समितिका कार्यकारी निर्देशक केशव द्यौरालीले विकासका पूर्वाधार निर्माण गर्दा गुरूयोजनालाई मुख्य प्राथमिकता दिनुपर्नेमा जोड दिंँदै गुरूयोजनाको प्राथमिकीकरण गर्नुपर्ने बताउनुभयो ।

इलाम सहयोग परिषद्का संयोजक राम रिमालले जिल्लाका जुनसुकै धार्मिक तथा पर्यटकीयस्थलको विकासका लागि गुरूयोजना आवश्यक रहेको र यसका लागि दाताको खोजी गर्नुपर्नेमा जोड दिनुभयो ।

सहायक वन अधिकृत सुनिलकुमार सिंहले गुरूयोजना जिल्ला वन कार्यालयमा पेस गर्न र जिल्ला वन कार्यालयले नर्सरी स्थापनाको लागि सहयोग गर्न तयार रहेको प्रतिबद्धता समेत जनाउनुभयो ।

गुरूयोजनाका लागि इलाम नगरपालिका कार्यालयका सहायक इन्जिनियर मेघनाथ ढुङ्गानाले भवन तथा संरचनाको लागत अनुमान तयार गर्नुभएको हो ।

नारायणस्थान मन्दिर परिसरमा बरबोटे निवासी मनबहादुर गुरूङ तथा गुरूङ परिवारले सहयोग गरी धर्मशाला निर्माण समेत गरिएको छ । रासस