पार्टी फुट्नुमा काँग्रेसका नेता खुमबहादुर खड्काको हात नरहेको एमाले उपाध्यक्ष गौतमको स्पष्टोक्ति

काठमाडौँ, नेकपा (एमाले)का उपाध्यक्ष गौतमले विगतमा एमाले पार्टी विभाजन हुँदा नेपाली काँग्रेसका नेता खुमबहादुर खड्काको हात रहेको भन्ने खड्काको अभिव्यक्तिको खण्डन गर्नुभएको छ ।

विसं २०५४ मा एमाले विभाजन भई नेकपा (माले) गठन भएको थियो भनेपछि सो समूह एमालेमै विलय भएको थियो ।

पूर्वउपप्रधानमन्त्री तथा गृहमन्त्री रहनुभएका उपाध्यक्ष गौतमले आज विज्ञप्ति प्रकाशन गरी “खड्कासँग मेरो पार्टी विभाजनका अगाडि वा तत्काल पछाडि पनि भेट भएको थिएन । खुमबहादुरसँग मैले सल्लाह गर्नुपर्ने कुनै आवश्यकता थिएन र त्यो कुनै पनि अवस्थामा महसुस पनि गरिन । पार्टी विभाजनमा कतैबाट सहयोग रकम पनि लिएको थिइन ।”

गौतमले पूर्वगृहमन्त्री खुमबहादुर एमाले विभाजनमा कुनै न कुनै तरिकाले लागेका छन् भन्ने थाहा मात्र पाएको भए पार्टी विभाजनमा आफ्नो संलग्नता कुनै पनि हालतमा नहुने पनि स्पष्ट गर्नुभएको छ ।

माले सरकारमा गएका बेला खड्काको सल्लाहमा आफूले तत्कालीन प्रहरी प्रमुख अच्युतकृष्ण खरेललाई हटाउन भनेको र आफूले नमान्दा आफू सरकारबाट हट्नुपरेको घटना पनि स्मरण गर्नुभएको छ । रासस