मधेस समस्या समाधानका लागि कांग्रेसले अगुवाई गर्ने

मधेस समस्या समाधानका लागि कांग्रेसले अगुवाई गर्ने कांग्रेस सभापति देउवाको भनाई, सबैलाई मिलाएर लान देउवालाई महामन्त्री कोइरालाको आग्रह

काठमाडौँ, नेपाली कांग्रेसका नवनिर्वाचित सभापति शेरबहादुर देउवाले मधेशका समस्या र सिमाङकनका विषयमा अगुवाईको भुमिका लिने बताउनुभएको छ । कांग्रेस काठमाण्डौं जिल्ला कार्यसमितिद्धारा आयोजित बधाई कार्यक्रममा नवनिर्वाचित सभापति देउवाले मधेशका समस्या समाधानमा अगुवाईको भुमिका लिने बताउनुभएको हो ।

कांग्रेस सभापति देउवाले मुलुकमा विद्यमान रहेको चुनौतीको सामाना गर्न पार्टी एक ढिक्का हुनुपर्ने बताउनुभयो । उहाँले नेपाली कांग्रेसको मजबुतीले मुलुकका समस्या समाधानमा सहज हुने दावी पनि गर्नुभयो ।

नवनिर्वाचित महामन्त्री शशांक कोइरालाले महाधिवशेनमा पराजित भएकाहरुलाई पनि मिलाएर लान सभापति देउवालाई आग्रह गर्नुभयो ।

केन्द्रीय सदस्य प्रकाशमान सिंहले भने पदाधिकारीमा पराजित भएका सबैलाई केन्द्रीय सदस्यमा मनोनीत गर्नु उचित नहुने तर्क राख्नुभयो । उँहाले पदाधिकारीमा पराजित अनुहारलाई मनोनीत गर्दा त्यसले पार्टीमा नराम्रो परम्पराको थालनी हुने भन्दै चिन्ता व्यक्त गर्नुभयो ।

नेता सिंहले पराजितहरू धेरैलाई नियुक्ति गर्दा त्यसले पार्टीभित्र गुटउपगुट धेरै भइ काम गर्न समस्या हुनेतर्फ पनि संकेत गर्नुभएको थियो ।