कांग्रेस बन्द सत्र

कांग्रेस महाधिवेशन अन्तर्गत आजदेखि बन्दसत्र सुरु हुँदै, नेतृत्वको लागि प्रतिष्पर्धा तीव्र भएपछि नीति तथा कार्यक्रममाथिको छलफल ओझेलमा

नेपाली कांग्रेसको १३ औं महाधिवेशन अन्तर्गत आज शुक्रबार बन्द सत्र सुरु हुँदैछ । काठमाडौंको भृकुटीमण्डपमा सुरु हुने बन्द सत्रमा पार्टीको नीति तथा कार्यक्रममाथि छलफल हुनेछ ।

बन्दसत्र सुरु नहुँदै नेतृत्वको लागि प्रतिष्पर्धा तीव्र भएपछि नीति तथा कार्यक्रममाथिको छलफल ओझेलमा पर्ने देखिएको हो । नेताहरु आआफ्नो समूहमा बाँडिएर चुनावी प्रचार गर्न व्यस्त छन् । मनोनयन दर्ता नहुँदै उम्मेदवारहरु मतदातालाई रिझाउन व्यस्त देखिएका छन् । महाधिवेशन प्रतिनिधिहरु बसेको तथा बन्द सत्र हुने ठाउँमा छुट्टाछुट्टै समूहको भेला तथा बहस कार्यक्रम सञ्चालन भैरहेका छन् । सभापतिका दावेदार पौडेल, देउवा र सिटौला तीनैजना दौडधुपमा व्यस्त छन् । संस्थापनबाटै दुई समूह भिडेकाले देउवा समूहले आफ्नो जित सुनिश्चित भएको दावी गरेको छ भने पौडेल र सिटौला समूह पनि आफ्नो पक्षले जित्नेमा ढुक्क भएको बताइरहेका छन् । कांग्रेसको विधान अनुसार निर्वाचनको पहिलो चरणमा सभापतिका कुनैपनि उम्मेदवारले ५१ प्रतिशत मत ल्याउनुपर्छ । त्यसो नभएमा फेरि दोस्रो चरणमा चुनाव हुनेछ ।