सहमति गर्ने भनिए पनि केही दिन यता दलहरुबीच संवाद नै भएन

प्रधानमन्त्रीको भारत भ्रमण अघि सहमति गर्ने भनिए पनि दलहरुबीच संवाद नै भएन, सहमतिका लागि सरकार गम्भीर नभएको मधेसी मोर्चाको आरोप ।

प्रधानमन्त्री केपी शर्मा ओली भारत भ्रमणमा जानु अघि नै मधेसी मोर्चासंग सहमति गर्ने भनिए पनि केही दिन यता दलहरुबीच संवाद हुन सकेको छैन । यसअघिको बैठकमा कार्यदल स्तरमा छलफल गरेर सहमतिमा पुग्ने बताइए पनि त्यसपछि कुनै पनि बैठक र छलफल भएको छैन ।प्रधानमन्त्री ओलीको आहृवानमा शुुक्रबार बालुवाटारमा भएको सर्वदलीय वार्तामा आज सोमबारसम्ममा सहमति गर्ने समझदारी भएपनि त्यसपछि कुनैपनि बैठक नभएको हो । बैठकमा कार्यदल स्तरमा गृहकार्य गर्ने र सहमतिमा पुग्ने निर्णय भएको थियो । तर, यो तीन दिनमा सहमतिको वातावरण बन्नुको साटो कार्यदलको बैठकसम्म बस्न सकेको छैन । शुक्रबार नै तीन दलको बैठक बसेर मधेसी मोर्चालाई खबर गर्ने भनिए पनि यसबारे अहिलेसम्म केही नभनिएको मोर्चाका नेताहरुले बताएका छन् । सहमतिका लागि सरकार र मुख्य दलहरु गम्भीर नभएको मोर्चाका नेताहरुको आरोप छ ।
प्रधानमन्त्री केपी शर्मा ओली फागुन ७ गते भारत भ्रमणमा जानु अघि नै मधेसी मोर्चासँग सहमति गर्ने तयारी छ । प्रमुख तीन दल र मधेसी मोर्चा राजनीतिक संयन्त्र बनाएर तीन महिनाभित्र सीमांकनबारे निर्णय गर्न सहमत भइसके पनि संयन्त्रको टिओआरमा सहमति जुटिसकेको छैन ।