भूकम्पपीडित भन्छन्-नक्साको घरमा बस्न मिल्दैन

भूकम्प सुरक्षा दिवसको सन्दर्भ पारेर शनिबार प्रधानमन्त्री केपी शर्मा ओलीले बुङमती क्षेत्रमा भूकम्पपछिको पुनर्निर्माण कार्यको धुमधामका साथ शिल्यान्यास गरे । उक्त अवसरमा सर्वसाधारण खुसी देखिन्थे । त्यसको चारदिनपछि बुधबार त्यही ठाउँ पुग्दा लगभग सुनसान देखिन्थ्यो । सर्वसाधारण निराश भेटिए ।

शनिबार कार्यक्रममा प्रधानमन्त्री, उपप्रधानमन्त्री विजयकुमार गच्छदार, शान्ति तथा पुनर्निर्माणमन्त्री एकनाथ ढकाल, गृहमन्त्री शक्ति बस्नेत, पुनर्निमाण प्राधिकरणका कार्यकारी अधिकृत सुशील ज्ञवाली लगायतले पारदर्शी ढंगबाट पुनर्निर्माणको कामलाई तीव्रता दिने प्रतिबद्धता गरेका थिए । उक्त सामुहिक आवाजको बुधबार केही असर नदेखिएको नागरिक दैनिकमा खबर छ ।

पुरानो नेवार बस्तीमा कोही शनिबार टाँगिएका आकर्षक नक्सा नियाल्दै थिए त केही भूकम्पले ढालेको आफ्नो घरको भग्नावशेष पन्छाउँदै थिए ।

भग्नावशेष पन्छाउँदै गरेका शैलेश शाक्यले आफूले आफ्नो घर नबनाई नहुँदै भन्दै सरकारले आश्वासन दिएकाले दुःख पाइएको बताए ।

ढोको बोकेर आउँदै गरेकी रश्मी शाक्य भित्तामा टाँसिएको नक्सामा आफ्नो घर खोज्दै थिइन् । उनले फेला पनि पारिन । घर आकर्षक थियो । सँगै रहेका श्रीमान प्रेम शाक्यलाई देखाइन नक्साको घर । प्रेमले भने-नक्साको घरमा बस्न मिल्दैन ।’