निस्सासिएर बाबु छोराको मृत्यु

पोखरा । कास्कीको लेखनाथ नगरपालिका–१२ गगनगौँडामा आइतबार धूवाँले निस्सासिएर दुई जनाको मृत्यु भएको छ ।

कोठा तताउन शनिबार राति बालेको कोइलाको चुलोबाट निस्किएको धूवाँमा निस्सासिएर ४५ वर्षीय ईन्द्रप्रसाद अधिकारी र उनका आठ महिनाका छोराको मृत्यु भएको जिल्ला प्रहरी कार्यालय कास्कीका प्रहरी नायब उपरीक्षक गुजुसिंह बज्राचार्यले जानकारी गराउनुभयो ।

उहाँका अनुसार स्थानीयवासीको खबरसँगै बिहान पुगेको प्रहरी टोलीले अचेत अवस्थामा रहेका ईन्द्रप्रसाद, उहाँकी श्रीमती सावित्री र नावालिग छोरालाई उपचारका लागि गण्डकी अस्पताल पोखरामा ल्याइएकामा बाबु र छोराको मृत्यु भएको हो ।

३५ वर्षीय सावित्रीको गम्भीर अवस्थामा अस्पतालमा उपचार भइरहेको छ । रासस